പ്രതിപക്ഷ ഉപനേതൃപദവിയെ ചൊല്ലിയുള്ള സിപിഎം-സിപിഐ തർക്കം ഇടതുമുന്നണിയുടെ കെട്ടുറപ്പിനെ ബാധിക്കുന്നതായി കേരള കോൺഗ്രസ് എം ചെയർമാൻ ജോസ് കെ. മാണി.
പ്രശ്നത്തിന് തൊലിപ്പുറത്തെ ചികിത്സ മാത്രം പോരെന്നും ആഴത്തിൽ പരിശോധിച്ച് പരിഹാരം കാണണമെന്നും അദ്ദേഹം വ്യക്തമാക്കി.
മുന്നണി പ്രവർത്തനത്തെയും പ്രതിപക്ഷ ഇടപെടലിനെയും ബാധിക്കുന്ന വിഷയത്തിൽ ഘടകകക്ഷികൾക്കിടയിൽ അതൃപ്തി തുടരുന്നതിനിടെയാണ് ജോസ് കെ. മാണിയുടെ പരസ്യ വിമർശനം.
അഭിപ്രായ വ്യത്യാസങ്ങൾ മുന്നണിയെ ദുർബലപ്പെടുത്തുന്ന സാഹചര്യം ഒഴിവാക്കണമെന്ന് ജോസ് കെ. മാണി ആവശ്യപ്പെട്ടു.
ജനങ്ങളുടെ വികാരം കൂടി മാനിച്ചായിരിക്കണം മുന്നണിയിലെ വിഷയങ്ങളിൽ തീരുമാനമെടുക്കേണ്ടതെന്നും അദ്ദേഹം പറഞ്ഞു.
പുറംതൊലിയിൽ മാത്രം മരുന്ന് പുരട്ടിയാൽ പ്രശ്നം പരിഹരിക്കാനാകില്ലെന്നും ഉള്ളിലുള്ള പ്രശ്നം എന്താണെന്ന് ആഴത്തിൽ പരിശോധിക്കേണ്ടതുണ്ടെന്നും ജോസ് കെ. മാണി വാർത്താസമ്മേളനത്തിൽ വ്യക്തമാക്കി.
പ്രതിപക്ഷ ഉപനേതൃപദവി സംബന്ധിച്ച വിഷയത്തിൽ കേരള കോൺഗ്രസ് എമ്മിന് എതിർപ്പോ വിയോജിപ്പോ ഇല്ലെന്നും ജോസ് കെ. മാണി വ്യക്തമാക്കി.
പദവിയെക്കാൾ പ്രധാനപ്പെട്ട നിരവധി വിഷയങ്ങൾ മുന്നണിക്ക് ഏറ്റെടുക്കാനുണ്ടെന്നും സിപിഎമ്മും സിപിഐയും തമ്മിൽ ആലോചിച്ച് വിഷയത്തിൽ ഉചിതമായ തീരുമാനം ഉണ്ടാകണമെന്നും അദ്ദേഹം ആവശ്യപ്പെട്ടു.
അതേസമയം, തങ്ങളുടെ അതൃപ്തി മുന്നണിക്കുള്ളിൽ തന്നെ പരിഹരിക്കണമെന്ന നിലപാടും ജോസ് കെ. മാണി ആവർത്തിച്ചു.
വിഷയം കൂടുതൽ വഷളാക്കേണ്ടതില്ലെന്ന നിലപാടിലാണ് സിപിഎമ്മും സിപിഐയും. പ്രശ്നപരിഹാരത്തിനായി ചർച്ചകൾക്ക് തയ്യാറാണെന്ന് സിപിഐ സംസ്ഥാന സെക്രട്ടറി ബിനോയ് വിശ്വം വ്യക്തമാക്കിയിട്ടുണ്ട്.
ഉപനേതൃപദവി സംബന്ധിച്ച തർക്കത്തിൽ ആവശ്യമായ ചർച്ചകൾ നടത്താമെന്നും അദ്ദേഹം സൂചിപ്പിച്ചു.
ഇടതുമുന്നണിയിൽ തുടരാൻ സിപിഐ പല ഘട്ടങ്ങളിലും ത്യാഗം ചെയ്തിട്ടുണ്ടെന്നും ബിനോയ് വിശ്വം ഓർമ്മിപ്പിച്ചു.
സിപിഐയുടെ ദേശീയ നേതൃത്വം ഇടപെട്ട് മുന്നോട്ടുവെച്ച ശുപാർശയിൽ ഇനി തുടർനടപടി സ്വീകരിക്കേണ്ടത് സിപിഎം-സിപിഐ സംസ്ഥാന നേതൃത്വങ്ങളാണ്.
സമവായത്തിനുള്ള നിർദേശങ്ങൾ ഉയർന്നുവന്നിട്ടുണ്ടെങ്കിലും പ്രശ്നപരിഹാരത്തിലേക്കുള്ള നിർണായക ചർച്ചകൾ ഇതുവരെ ആരംഭിച്ചിട്ടില്ല.
സംസ്ഥാനതലത്തിൽ ഇരു പാർട്ടികളും തമ്മിലുള്ള ഉഭയകക്ഷി ധാരണയ്ക്ക് ഇതുവരെ വ്യക്തമായ സാഹചര്യം ഒരുങ്ങിയിട്ടില്ല.
അതേസമയം, ഉപനേതൃപദവി വിവാദത്തിൽ ഘടകകക്ഷികൾക്കിടയിലെ മുറുമുറുപ്പ് തുടരുകയാണ്.
വിഷയത്തിൽ കേരള കോൺഗ്രസ് എം പരസ്യമായി വിയോജിപ്പ് രേഖപ്പെടുത്തിയതോടെ മുന്നണിക്കുള്ളിലെ അസ്വസ്ഥത വീണ്ടും ചർച്ചയാകുകയാണ്. എന്നാൽ മുന്നണി വിടുന്നതിനെക്കുറിച്ച് യാതൊരു ആലോചനയുമില്ലെന്നും എൽഡിഎഫിൽ തന്നെ തുടരുമെന്നും ജോസ് കെ. മാണി വ്യക്തമാക്കി. തർക്കം മുന്നണിയുടെ പ്രവർത്തനത്തെ ബാധിക്കാതെ സിപിഎമ്മും സിപിഐയും തമ്മിൽ ചർച്ച ചെയ്ത് എത്രയും വേഗം പരിഹാരം കാണണമെന്നാണ് കേരള കോൺഗ്രസിന്റെ നിലപാട്.
