ന്യൂഡൽഹി: രാജസ്ഥാനിലെ സർക്കാർ ആശുപത്രിയിൽ പ്രസവത്തെ തുടർന്ന് സ്ത്രീകൾക്ക് ഗുരുതരമായ ആരോഗ്യപ്രശ്നങ്ങൾ ഉണ്ടായ സംഭവത്തിൽ രാജസ്ഥാൻ ആരോഗ്യമന്ത്രിയുടെ വിവാദ പ്രസ്താവന.
ബിക്കാനീറിലെ പ്രിൻസ് ബിജയ് സിങ് മെമ്മോറിയൽ (പിബിഎം) ആശുപത്രിയിൽ ചികിത്സയിലായിരുന്ന അഞ്ച് സ്ത്രീകൾക്ക് പ്രസവശേഷം വൃക്കയ്ക്ക് തകരാർ സംഭവിച്ചതു.
മാതൃത്വത്തെയും ഗർഭിണികളായ സ്ത്രീകളെയും അപമാനിക്കുന്ന തരത്തിലുള്ള മന്ത്രിയുടെ വാക്കുകൾക്കെതിരെ കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ ശക്തമായ പ്രതിഷേധവുമായി രംഗത്തെത്തി.
ബിക്കാനീർ ആശുപത്രിയിലെ ദുരന്തവും മന്ത്രിയുടെ ന്യായീകരണവും.
ആശുപത്രിയിലെ ചികിത്സാ പിഴവുകളെക്കുറിച്ചുള്ള മാധ്യമപ്രവർത്തകരുടെ ചോദ്യങ്ങളോട് തീർത്തും നിർവികാരമായാണ് മന്ത്രി പ്രതികരിച്ചത്.
ആശുപത്രിയിൽ പ്രവേശിപ്പിക്കപ്പെടുമ്പോൾ തന്നെ ഈ സ്ത്രീകളുടെ ആരോഗ്യനില ഗുരുതരമായിരുന്നുവെന്ന് സ്ഥാപിക്കാനാണ് അദ്ദേഹം ശ്രമിച്ചത്. ഇതിനായി മന്ത്രി ഉപയോഗിച്ച വാക്കുകളാണ് കടുത്ത വിമർശനത്തിന് ഇടയാക്കിയത്.
“ആശുപത്രിയിൽ അഡ്മിറ്റ് ചെയ്യുമ്പോൾ തന്നെ അവരുടെ നില ഗുരുതരമായിരുന്നു. ഗർഭിണികൾ ഏത് അവസ്ഥയിലാണ് ഇവിടെ എത്തിയതെന്ന് പ്രിൻസിപ്പൽ വ്യക്തമാക്കട്ടെ. അവർ വരുമ്പോൾ തന്നെ അവശരായിരുന്നോ? അതോ നൃത്തം ചെയ്താണോ വന്നത്?” എന്നായിരുന്നു മന്ത്രിയുടെ ചോദ്യം.
“ആരും രക്ഷിക്കുന്നതിനെക്കുറിച്ച് പറയുന്നില്ല”.
ആരോഗ്യ പ്രവർത്തകരുടെ സേവനങ്ങളെ മുൻനിർത്തി വീഴ്ചകളെ ന്യായീകരിക്കാനും ഗജേന്ദ്ര സിങ് ഖിൻവ്സാർ ശ്രമിച്ചു. “ആരോഗ്യ പ്രവർത്തകർ ദിവസേന നിരവധി പേരെ രക്ഷിക്കുന്നുണ്ട്. പക്ഷേ, അതിനെക്കുറിച്ചൊന്നും ആരും ഒന്നും പറയുന്നില്ല. എല്ലാവരും മരണനിരക്കിനെക്കുറിച്ച് മാത്രമാണ് സംസാരിക്കുന്നത്. ആയിരം പേർ ആശുപത്രിയിൽ വന്നാൽ രണ്ടുപേർ മാത്രമാണ് മരിക്കുന്നത്. ബാക്കിയുള്ളവർ സുഖം പ്രാപിച്ച് വീട്ടിലേക്ക് പോകുന്നു. ആരും അതിനെക്കുറിച്ചൊന്നും സംസാരിക്കുന്നില്ല,” മന്ത്രി കൂട്ടിച്ചേർത്തു. ഭരണഘടനാ പദവിയിലിരിക്കുന്ന ഒരാളുടെ ഭാഗത്തുനിന്നും മനുഷ്യജീവനുകളെ ലഘൂകരിച്ചുകാണുന്ന തരത്തിലുള്ള ഈ പ്രതികരണം വലിയ പ്രതിഷേധമാണ് ക്ഷണിച്ചുവരുത്തിയിരിക്കുന്നത്.
മാതൃത്വത്തോടുള്ള അധിക്ഷേപമെന്ന് പ്രതിപക്ഷം.
മന്ത്രിയുടെ പ്രസ്താവന പുറത്തുവന്നതിന് പിന്നാലെ രൂക്ഷവിമർശനവുമായി സംസ്ഥാന നിയമസഭയിലെ പ്രതിപക്ഷ നേതാവ് ടിക്കാറാം ജുല്ലി രംഗത്തെത്തി. പ്രസവവേദന അനുഭവിക്കുന്ന സ്ത്രീകൾ നൃത്തം ചെയ്തു വരുന്നുവെന്ന മന്ത്രിയുടെ പരിഹാസം മാതൃത്വത്തോടുള്ള കടുത്ത അധിക്ഷേപമാണെന്ന് അദ്ദേഹം തുറന്നടിച്ചു.
“പാട്ടിനെയും നൃത്തത്തെയും പറ്റിയുള്ള പരിഹാസങ്ങളല്ല, മറിച്ച് പ്രസവവേദന അനുഭവിച്ച് ആശുപത്രിയിലെത്തുന്ന ഒരു സ്ത്രീക്ക് ഏറ്റവും മികച്ച ആരോഗ്യസൗകര്യങ്ങളാണ് സർക്കാർ ഉറപ്പാക്കേണ്ടത്,” ജുല്ലി ഓർമ്മിപ്പിച്ചു.
സർക്കാർ ആശുപത്രികളുടെ ശോചനീയാവസ്ഥ.
സംസ്ഥാനത്തെ സർക്കാർ ആശുപത്രികളുടെ അടിസ്ഥാന സൗകര്യമില്ലായ്മയിലേക്കും പ്രതിപക്ഷം വിരൽചൂണ്ടുന്നു . അത്യാഹിത വിഭാഗത്തിൽ എത്തുന്ന ഗർഭിണികൾക്ക് പോലും ആവശ്യത്തിന് സ്ട്രെച്ചറുകൾ ലഭ്യമാകാത്ത അവസ്ഥയാണ് നിലവിലുള്ളത് . ആരോഗ്യമേഖലയിലെ സ്വന്തം പരാജയങ്ങൾ മറച്ചുവെക്കാനാണ് ഗജേന്ദ്ര സിങ് ഖിൻവ്സാർ ഇത്തരം ഉത്തരവാദിത്തമില്ലാത്ത വാക്കുകൾ ഉപയോഗിക്കുന്നതെന്നും പ്രതിപക്ഷ നേതാവ് ആരോപിച്ചു . ആരോഗ്യമന്ത്രിയുടെ നടപടി ലജ്ജാകരമാണെന്നും, സംസ്ഥാനത്തെ ജനങ്ങളോടും പ്രത്യേകിച്ച് സ്ത്രീ സമൂഹത്തോടും അദ്ദേഹം പരസ്യമായി മാപ്പുപറയണമെന്നും കോൺഗ്രസ് ശക്തമായി ആവശ്യപ്പെട്ടു.
