കൊച്ചി: അർജന്റീന ഫുട്ബോൾ താരം ലയണൽ മെസ്സിയെ കേരളത്തിലെത്തിക്കാമെന്ന് വാഗ്ദാനം ചെയ്ത് തട്ടിപ്പ് നടത്തിയ കേസിൽ പൊലീസിന്റെ നിർണായക നടപടി.
കേസുമായി ബന്ധപ്പെട്ട് അഗസ്റ്റിൻ സഹോദരന്മാരുടെ വീടുകളിലും സ്ഥാപനങ്ങളിലും പ്രത്യേക അന്വേഷണ സംഘം പുലർച്ചെ മുതൽ വ്യാപക റെയ്ഡ് നടത്തി. കൊച്ചിയിലെ വീടുകൾ, ആർ.ബി.സി ഓഫീസ്, വയനാട്ടിലെ തറവാട്ടു വീട് എന്നിവിടങ്ങളിലാണ് പരിശോധന നടന്നത്.
കോടതിയിൽ നിന്ന് കൃത്യമായ വാറണ്ട് വാങ്ങിയ ശേഷമാണ് അന്വേഷണ സംഘം മിന്നൽ പരിശോധനയ്ക്ക് മുതിർന്നത്. കായിക വകുപ്പ് നടത്തിയ പ്രാഥമിക അന്വേഷണത്തിൽ തന്നെ വൻ സാമ്പത്തിക തട്ടിപ്പ് നടന്നതായി കണ്ടെത്തിയിരുന്നു.
ഇതിന് പിന്നാലെ ജി.എസ്.ടി വകുപ്പും സാമ്പത്തിക ഇടപാടുകളിലെ ഗുരുതര ക്രമക്കേടുകൾ വ്യക്തമാക്കി റിപ്പോർട്ട് പുറത്തുവിട്ടു.
കളമശ്ശേരി പൊലീസ് സ്റ്റേഷനിൽ മുൻപ് രജിസ്റ്റർ ചെയ്ത കേസിന്റെ തുടർച്ചയായാണ് ഇപ്പോഴത്തെ നിർണായക നീക്കങ്ങൾ.
കേസിന്റെ പ്രാധാന്യം കണക്കിലെടുത്ത് മുതിർന്ന ഐ.പി.എസ് ഉദ്യോഗസ്ഥൻ എ.ഡി.ജി.പി പി. വിജയനെ സർക്കാർ അന്വേഷണ ചുമതല ഏൽപ്പിച്ചിരുന്നു. അദ്ദേഹത്തിന്റെ നേതൃത്വത്തിലുള്ള പ്രത്യേക സംഘമാണ് ഇപ്പോൾ രേഖകൾ പിടിച്ചെടുക്കുന്നത്.
ആർ.ബി.സി ഓഫീസ് സ്ഥിതി ചെയ്യുന്ന റിപ്പോർട്ടർ ചാനലിന്റെ കെട്ടിടത്തിലും അന്വേഷണ സംഘം വിശദമായ പരിശോധന നടത്തി.
തൃക്കാക്കര എ.സി.പിയുടെ നേരിട്ടുള്ള മേൽനോട്ടത്തിലാണ് ഈ കെട്ടിടത്തിലെ റെയ്ഡ് പുരോഗമിച്ചത്. തട്ടിപ്പുമായി ബന്ധപ്പെട്ട ഡിജിറ്റൽ തെളിവുകളും സാമ്പത്തിക ഇടപാട് രേഖകളും കണ്ടെടുക്കുകയാണ് പരിശോധനയുടെ പ്രധാന ലക്ഷ്യം.
വിവാദപരമായ ഈ സാമ്പത്തിക ഇടപാടിൽ കൂടുതൽ പ്രമുഖർക്ക് പങ്കുണ്ടോ എന്നും പൊലീസ് വിശദമായി അന്വേഷിക്കുന്നുണ്ട്. വരും ദിവസങ്ങളിൽ കൂടുതൽ പേരെ ചോദ്യം ചെയ്യാൻ വിളിപ്പിക്കുമെന്നാണ് ലഭ്യമാകുന്ന ഔദ്യോഗിക വിവരങ്ങൾ.
സാമ്പത്തിക ക്രമക്കേടിന്റെ വ്യാപ്തി വലുതാണെന്ന് പ്രാഥമിക വിലയിരുത്തലിൽ തന്നെ വ്യക്തമായിട്ടുണ്ട്.
