വിയറ്റ്നാമിലെ ഫുക്വോക് ദ്വീപിന് സമീപമുണ്ടായ ബോട്ട് ദുരന്തം മലയാളികളെയാകെ കണ്ണീരിലാഴ്ത്തിയിരിക്കുകയാണ്. വിനോദസഞ്ചാരത്തിനിടെയുണ്ടായ അപകടത്തിൽ കൊട്ടാരക്കര ചന്തമുക്ക് ആവിയോട്ട് വീട്ടിൽ എ.സി. തോമസും (57) ഭാര്യ ലൗനി തോമസും (56) ആണ് മരണപ്പെട്ടത്. വിക്ടറി ഗ്രൂപ്പിന്റെ ഉടമകളാണ് ഇരുവരും.
ലാവ സ്മാർട്ട്ഫോൺ കമ്പനി ഡീലർമാർക്കായി സംഘടിപ്പിച്ച ബിസിനസ് ടൂറിലായിരുന്നു ഇരുവരും പങ്കെടുത്തത്. 32 ഇന്ത്യൻ വിനോദസഞ്ചാരികളും നാല് ക്രൂ അംഗങ്ങളും ഉൾപ്പെടെ 36 പേരാണ് ബോട്ടിലുണ്ടായിരുന്നത്.
ജൂലൈ 11-ന് ഉച്ചയോടെ ഹോൺ മേയ് റുട്ട് ദ്വീപിൽ നിന്ന് അന്തോയ് തുറമുഖത്തേക്ക് മടങ്ങുമ്പോഴായിരുന്നു ദാരുണമായ അപകടം. മോശം കാലാവസ്ഥയും ശക്തമായ തിരമാലകളുമാണ് അപകടകാരണമെന്ന് പ്രാഥമിക നിഗമനം.
സംഭവസ്ഥലത്ത് വെച്ചുതന്നെ 15 പേർ മരണപ്പെട്ടതായി അധികൃതർ സ്ഥിരീകരിച്ചു. മരിച്ചവരിൽ പത്ത് പേർ തമിഴ്നാട്ടിൽ നിന്നും, മൂന്ന് പേർ ആന്ധ്രാപ്രദേശിൽ നിന്നും, രണ്ട് പേർ കേരളത്തിൽ നിന്നുമുള്ളവരാണ്.
ബോട്ടിലുണ്ടായിരുന്ന 21 പേരെ വിയറ്റ്നാം രക്ഷാസേന ജീവനോടെ രക്ഷപ്പെടുത്തി. നിലവിൽ ഇവർ വിവിധ ആശുപത്രികളിൽ ചികിത്സയിലാണ്.
കൊല്ലം ജില്ലാ ഭരണകൂടവും സർക്കാരും മരണവിവരം ഔദ്യോഗികമായി സ്ഥിരീകരിച്ചു. മൃതദേഹങ്ങൾ നാട്ടിലെത്തിക്കുന്നതിനുള്ള അടിയന്തര നടപടികൾ സ്വീകരിക്കണമെന്ന് കൊടിക്കുന്നിൽ സുരേഷ് എം.പി കേന്ദ്ര സർക്കാരിനോട് ആവശ്യപ്പെട്ടിട്ടുണ്ട്.
പ്രധാനമന്ത്രി നരേന്ദ്ര മോദിയും രാഷ്ട്രപതിയും ഉൾപ്പെടെയുള്ളവർ സംഭവത്തിൽ അനുശോചനം രേഖപ്പെടുത്തി.
തങ്ങളുടെ ബിസിനസ് പങ്കാളികളായ ഡീലർമാർക്ക് സംഭവിച്ച അപകടത്തിൽ ലാവ ഇന്റർനാഷണൽ കമ്പനി അതീവ ദുഃഖം പ്രകടിപ്പിച്ചു. മരിച്ചവരുടെ കുടുംബങ്ങൾക്ക് എല്ലാവിധ സഹായങ്ങളും കമ്പനി വാഗ്ദാനം ചെയ്തിട്ടുണ്ട്.
വിയറ്റ്നാമിലെ ഇന്ത്യൻ എംബസിയും ഹോ ചിമിൻ സിറ്റിയിലെ കോൺസുലേറ്റും രക്ഷാപ്രവർത്തനങ്ങൾക്കും സഹായങ്ങൾക്കുമായി അടിയന്തര കൺട്രോൾ റൂമുകൾ തുറന്നു.
കൊട്ടാരക്കരയിലെ സാമൂഹിക-ജീവകാരുണ്യ പ്രവർത്തനങ്ങളിൽ സജീവ സാന്നിധ്യമായിരുന്നു എ.സി തോമസ്. വിക്ടറി ഗ്രൂപ്പിന്റെ നേതൃത്വത്തിൽ മരുന്നുകൾ, സർജിക്കൽ ഉപകരണങ്ങൾ എന്നിവയുടെ വിതരണത്തിന് പുറമെ പെട്രോൾ പമ്പ്, ഡെന്റൽ ക്ലിനിക് തുടങ്ങിയ വിവിധ സംരംഭങ്ങളും ഇദ്ദേഹം നടത്തിവന്നിരുന്നു.
പാവപ്പെട്ടവർക്ക് ചികിത്സാ സഹായം നൽകുന്നതിലും നിർദ്ധനരായ കുട്ടികളുടെ പഠനത്തിന് വഴിയൊരുക്കുന്നതിലും തോമസ് മുൻപന്തിയിലുണ്ടായിരുന്നു. ആ കാരുണ്യത്തണലാണ് ഒരു വിദേശ യാത്രയ്ക്കിടെ അപ്രതീക്ഷിതമായി പൊലിഞ്ഞുപോയത്. നാട്ടുകാർക്കും സുഹൃത്തുക്കൾക്കും ഇപ്പോഴും ഈ വാർത്ത വിശ്വസിക്കാനായിട്ടില്ല.
