വണ്ടൂരിൽ ഭർത്താവിന്റെ കുത്തേറ്റ് ഫസീല കൊല്ലപ്പെട്ട കേസിൽ നിർണായക വിവരങ്ങൾ പുറത്തുവന്നു.
മദ്യലഹരിയിലായിരുന്ന ഭർത്താവ് റഷീദ് നടത്തിയത് അപ്രതീക്ഷിത ആക്രമണമായിരുന്നു.
ഫസീലയുടെ ഇടതുനെഞ്ചിൽ ഏറ്റ ഒറ്റക്കുത്തിൽ ഹൃദയം തുളച്ചുകയറി.
കുത്തേറ്റ് 15 മിനിറ്റിനകം മരണം സംഭവിച്ചതായി പോസ്റ്റ്മോർട്ടം റിപ്പോർട്ട് വ്യക്തമാക്കുന്നു.
രണ്ടാം വാരിയെല്ലിനിടയിലൂടെയാണ് മൂർച്ചയേറിയ കത്തി ഹൃദയത്തിലേക്ക് തുളഞ്ഞുകയറിയത്.
സംഭവസമയം ശരീരത്തിൽ പിടിവലി നടന്നതായി സംശയിക്കാവുന്ന പാടുകളുമുണ്ട്.
വണ്ടൂർ സി.ഐ. ഗോപകുമാറിന്റെ നേതൃത്വത്തിലാണ് ഇൻക്വസ്റ്റ് നടപടികൾ പൂർത്തിയാക്കിയത്.
മഞ്ചേരി മെഡിക്കൽ കോളേജിൽ പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകി.
സ്വന്തം വീട്ടിലെത്തിച്ച മൃതദേഹം കാണാൻ വൻ ജനക്കൂട്ടമാണ് തടിച്ചുകൂടിയത്.
വൈകുന്നേരത്തോടെ പള്ളിക്കുന്ന് ജുമാമസ്ജിദ് ഖബർസ്ഥാനിൽ മൃതദേഹം കബറടക്കി.
കൊലപാതകം നടന്ന വീട്ടിൽ പോലീസ് പ്രതിയുമായി തെളിവെടുപ്പ് നടത്തി.
ഉച്ചഭക്ഷണത്തിന് കറിയുണ്ടാക്കാത്തതാണ് പ്രകോപനത്തിന് കാരണമായതെന്ന് പ്രതി പോലീസിനോട് പറഞ്ഞു.
തർക്കത്തിനിടെ അടുക്കളയിലെ മേശയിലിരുന്ന ഫസീലയെ പെട്ടെന്നുള്ള പ്രകോപനത്തിൽ കുത്തുകയായിരുന്നു.
പ്രതിയുടെ മാതാവ് തടയാൻ ശ്രമിച്ചെങ്കിലും ആക്രമണം തടയാനായില്ല.
തെളിവെടുപ്പ് സമയത്ത് പ്രതി യാതൊരു ഭയവുമില്ലാതെയാണ് കാര്യങ്ങൾ വിശദീകരിച്ചത്.
തെളിവെടുപ്പിനുശേഷം പ്രതിയെ പെരിന്തൽമണ്ണ കോടതിയിൽ ഹാജരാക്കി റിമാൻഡ് ചെയ്തു.
