യുപിഐ ഇടപാടുകൾക്ക് മർച്ചന്റ് ഡിസ്‌കൗണ്ട് റേറ്റ് (എംഡിആർ) ഏർപ്പെടുത്താനുള്ള തീരുമാനം ദീപാവലിക്ക് ശേഷം നടപ്പിലാക്കാൻ നാഷണൽ പേയ്‌മെന്റ്‌സ് കോർപ്പറേഷൻ ഓഫ് ഇന്ത്യ (എൻപിസിഐ) തീരുമാനിച്ചു.
ഉത്സവകാലത്തെ വ്യാപാരത്തെ ബാധിക്കാതിരിക്കാനാണ് നടപടി വൈകിപ്പിക്കുന്നത്. തെരഞ്ഞെടുത്ത പേഴ്‌സൺ ടു മർച്ചന്റ് (പി2എം) യുപിഐ ഇടപാടുകൾക്കാണ് പുതിയ നിരക്ക് ബാധകമാകുക. ഒക്ടോബർ 15 മുതൽ ചാർജ് നിലവിൽ വരുമെന്നായിരുന്നു നേരത്തെ അറിയിച്ചിരുന്നത്.
വ്യാപാരി സംഘടനകൾ, ഫിൻടെക് സ്ഥാപനങ്ങൾ, പേയ്‌മെന്റ് കമ്പനികൾ എന്നിവയുടെ അഭ്യർഥന പരിഗണിച്ചാണ് തീരുമാനം.
ഉത്സവകാലത്ത് ഇടപാടുകൾ വർധിക്കുന്ന സാഹചര്യത്തിൽ പുതിയ ചാർജ് നടപ്പിലാക്കുന്നത് വ്യാപാരികൾക്ക് അധിക സാമ്പത്തിക ബാധ്യതയുണ്ടാക്കുമെന്ന ആശങ്ക ഉയർന്നിരുന്നു. ഇതിന് പിന്നാലെയാണ് തീരുമാനം മാറ്റിവെച്ചത്.
രണ്ടായിരം രൂപയ്ക്ക് മുകളിലുള്ള തെരഞ്ഞെടുത്ത യുപിഐ ഇടപാടുകൾക്ക് 0.4 ശതമാനം നിരക്കിൽ എംഡിആർ ഈടാക്കാനാണ് നിർദേശം.
ഈ നിരക്ക് പ്രകാരം പതിനായിരം രൂപയുടെ ഇടപാടിന് 40 രൂപ ചാർജായി വരും. ഡിജിറ്റൽ പേയ്‌മെന്റുകൾ സ്വീകരിക്കുന്നതിന് വ്യാപാരികൾ നൽകേണ്ട ഫീസാണ് എംഡിആർ. എന്നാൽ എല്ലാ യുപിഐ ഇടപാടുകൾക്കും ഈ ചാർജ് ബാധകമാകുമെന്ന് അർഥമില്ല.
നിർദേശത്തിന്റെ പരിധിയിൽ വരുന്ന പ്രത്യേക പി2എം ഇടപാടുകൾക്കാണ് ഇത് ബാധകമാകുക.
ഷോപ്പിങ്, ഇലക്ട്രോണിക്‌സ് ഉൽപ്പന്നങ്ങൾ, യാത്രകൾ തുടങ്ങിയ മേഖലകളിൽ ഉത്സവകാലത്ത് വിൽപ്പന വർധിക്കാറുണ്ട്.
ഈ സമയത്ത് പുതിയ ചാർജ് നടപ്പിലാക്കുന്നത് വ്യാപാരികളെയും ഓൺലൈൻ വിൽപ്പനക്കാരെയും ബാധിക്കുമെന്ന ആശങ്കയുണ്ടായിരുന്നു.
തീരുമാനം ദീപാവലിക്ക് ശേഷം നടപ്പിലാക്കുന്നത് കൂടുതൽ തയ്യാറെടുപ്പുകൾക്ക് വ്യാപാരികൾക്ക് സമയം നൽകും.
ഒക്ടോബർ 13ന് പുറത്തിറക്കിയ അറിയിപ്പിൽ പുതിയ ചാർജ് പ്രാബല്യത്തിൽ വരുന്ന കൃത്യമായ തീയതി എൻപിസിഐ വ്യക്തമാക്കിയിട്ടില്ല.
ദീപാവലിക്ക് തൊട്ടുപിന്നാലെ നടപ്പിലാക്കുമെന്നാണ് അറിയിച്ചിരിക്കുന്നത്. ഏതെല്ലാം ഇടപാടുകൾക്കാണ് നിരക്ക് ബാധകമാകുക, വിവിധ വിഭാഗങ്ങൾക്ക് വ്യത്യസ്ത നിരക്കുകളുണ്ടാകുമോ തുടങ്ങിയ കാര്യങ്ങളിലും കൂടുതൽ വ്യക്തത വരാനുണ്ട്.
ഔദ്യോഗിക തീയതിയും വിശദമായ മാർഗനിർദേശങ്ങളും പുറത്തുവരുന്നതോടെ പുതിയ തീരുമാനം വ്യാപാരികളെയും ഉപഭോക്താക്കളെയും എങ്ങനെ ബാധിക്കുമെന്നതിൽ വ്യക്തത ലഭിക്കും.
