മിഡിൽ ഈസ്റ്റിൽ യുദ്ധഭീതി ശക്തമാകുന്നു. യെമനിലെ ഹൂത്തികളുടെ നിയന്ത്രണത്തിലുള്ള ഹൊദൈദ തുറമുഖത്ത് സൗദി സഖ്യസേന വ്യോമാക്രമണം നടത്തിയതിന് പിന്നാലെ റിയാദിലേക്ക് മൂന്ന് ബാലിസ്റ്റിക് മിസൈലുകൾ തൊടുത്തുവിട്ട് ഹൂത്തികളുടെ തിരിച്ചടി.
തെക്കൻ സൗദിയിലേക്ക് ഡ്രോൺ ആക്രമണവും ഉണ്ടായതായി റിപ്പോർട്ട്.
ആയുധക്കടത്ത് തടയാനാണ് ഹൊദൈദ തുറമുഖത്ത് ആക്രമണം നടത്തിയതെന്നാണ് സൗദി സഖ്യസേനയുടെ വിശദീകരണം.
ഇതിന് പിന്നാലെ ജിദ്ദ ഉൾപ്പെടെയുള്ള സൗദി തുറമുഖങ്ങളിൽ നിന്ന് ആളുകൾ ഒഴിഞ്ഞുപോകണമെന്ന് ഹൂത്തികൾ മുന്നറിയിപ്പ് നൽകി.
സൗദി വ്യോമപ്രതിരോധ സംവിധാനം മിസൈലുകൾ തകർത്തതായും റിപ്പോർട്ടുകളുണ്ട്.
അതിനിടെ ഹോർമൂസ് കടലിടുക്കിന് സമീപം ഒമാനിലെ ഖസാബിന് അടുത്ത് രണ്ട് എണ്ണക്കപ്പലുകൾ ആക്രമിക്കപ്പെട്ടു.
ആളപായമില്ലെന്നാണ് പ്രാഥമിക വിവരം. അമേരിക്കയുടെ MQ-9 ഡ്രോൺ വെടിവെച്ചിട്ടതായി ഇറാന്റെ ഐആർജിസിയും അവകാശപ്പെട്ടു. എന്നാൽ ഇക്കാര്യം സ്വതന്ത്രമായി സ്ഥിരീകരിച്ചിട്ടില്ല.
ഇറാനെതിരെ ഉപരോധം ശക്തമാക്കുമെന്ന് അമേരിക്കൻ പ്രസിഡന്റ് ഡോണൾഡ് ട്രംപ് മുന്നറിയിപ്പ് നൽകി.
അതേസമയം, 60 ശതമാനം വരെ സമ്പുഷ്ടീകരിച്ച യുറേനിയം ശേഖരം രാജ്യത്തിന് പുറത്തേക്ക് മാറ്റില്ലെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. നയതന്ത്ര ചർച്ചകൾക്ക് സാധ്യതയുണ്ടെന്നും ഇറാൻ അറിയിച്ചു.
ചെങ്കടലിലും ഹോർമൂസിലും സംഘർഷം വ്യാപിക്കുന്നത് ആഗോള കപ്പൽ ഗതാഗതത്തിനും എണ്ണവിപണിക്കും വലിയ ആശങ്ക സൃഷ്ടിക്കുകയാണ്.


