ബംഗളൂരു കൊടിഹള്ളിയിൽ ദാരുണമായ കൊലപാതകം റിപ്പോർട്ട് ചെയ്തു. നാലാം വർഷ നിയമ വിദ്യാർത്ഥിനിയായ അമൃതയാണ് കൊല്ലപ്പെട്ടത്. കേസിൽ മുൻ കാമുകൻ ധനുഷിനെയും സഹോദരൻ സൂര്യയെയും പോലീസ് അറസ്റ്റ് ചെയ്തു.
മൂന്ന് വർഷം മുൻപാണ് ഇവർ പ്രണയത്തിലായത്. ഒരു തീർത്ഥാടന യാത്രയ്ക്കിടെയാണ് ഇവർ കണ്ടുമുട്ടിയത്. എന്നാൽ ധനുഷ് വിവാഹിതനാണെന്ന കാര്യം അമൃത വൈകിയാണ് അറിഞ്ഞത്. ഇയാൾക്ക് ഒരു കുട്ടിയുമുണ്ട്.
വഞ്ചന തിരിച്ചറിഞ്ഞ അമൃത ബന്ധത്തിൽ നിന്ന് പിന്മാറി. ഇതിൽ പ്രകോപിതനായ ധനുഷ് അമൃതയോട് പക വെച്ചു. സഹോദരൻ സൂര്യയും അമൃതയെ ഭീഷണിപ്പെടുത്തിയിരുന്നു.
ജൂലൈ 13-ന് വൈകുന്നേരം അമൃതയുടെ വീടിന് സമീപത്തുവെച്ച് പ്രതികൾ തടഞ്ഞുനിർത്തി. തർക്കത്തിനിടെ സൂര്യ അമൃതയെ കത്തിയെടുത്ത് കുത്തി. നെഞ്ചിലും പുറത്തും ഗുരുതരമായി മുറിവേറ്റു.
വീട്ടുകാർ അമൃതയെ ഉടൻ ആശുപത്രിയിലെത്തിച്ചു. മൂന്ന് ദിവസത്തോളം മരണത്തോട് മല്ലിട്ടു. ജൂലൈ 15 വൈകുന്നേരം അമൃത മരണത്തിന് കീഴടങ്ങി.
സി.വി രാമൻ ആശുപത്രിയിൽ മൃതദേഹം പോസ്റ്റ്മോർട്ടം നടത്തി. പ്രതികളെ പോലീസ് പിടികൂടിയിട്ടുണ്ട്. അന്വേഷണം തുടരുകയാണെന്ന് ഉന്നത ഉദ്യോഗസ്ഥർ വ്യക്തമാക്കി.
