ഡിജിറ്റൽ സാമ്പത്തിക തട്ടിപ്പുകൾ തടയുന്നതിൽ ബാങ്കുകൾക്കും നിർണായക ഉത്തരവാദിത്വമുണ്ടെന്ന് സുപ്രീം കോടതി.
ബാങ്കുകളുടെ ജാഗ്രതക്കുറവ് മൂലമാണ് തട്ടിപ്പ് നടന്നതെന്ന് തെളിഞ്ഞാൽ ഇരകൾക്ക് നഷ്ടപ്പെട്ട തുകയെങ്കിലും തിരികെ നൽകാൻ ധനകാര്യ സ്ഥാപനങ്ങൾ ബാധ്യസ്ഥരാകുമെന്ന് കോടതി വ്യക്തമാക്കി.
അക്കൗണ്ട് ഉടമയുടെ പതിവ് ഇടപാടുകളിൽനിന്ന് വ്യത്യസ്തമായ വലിയ തുകയുടെ ഇടപാടുകൾ സംശയാസ്പദമായി കണക്കാക്കി പരിശോധിക്കണമെന്ന് കോടതി നിർദ്ദേശിച്ചു.
സംശയകരമായ ഇടപാടുകൾ കണ്ടെത്താൻ ഓട്ടോമേറ്റഡ് സംവിധാനങ്ങൾ ഏർപ്പെടുത്തണം. ഇടപാടുകളുടെ ആധികാരികത ഉറപ്പാക്കാൻ ആവശ്യമായ സാഹചര്യങ്ങളിൽ നേരിട്ടുള്ള പരിശോധനയും നടത്തണം.
സാധാരണയായി ചെറിയ തുകകൾ മാത്രം പിൻവലിക്കുന്ന ഒരാൾ പെട്ടെന്ന് വലിയ തുക പിൻവലിച്ചാൽ ബാങ്കുകൾ അത് ശ്രദ്ധിക്കേണ്ടതല്ലേയെന്നും ചീഫ് ജസ്റ്റിസ് സൂര്യകാന്ത് ചോദിച്ചു.
ഉപഭോക്താക്കളെ തട്ടിപ്പുകളിൽനിന്ന് സംരക്ഷിക്കേണ്ടത് ബാങ്കുകളുടെ കടമയാണെന്നും അദ്ദേഹം ഓർമ്മിപ്പിച്ചു.
ഡിജിറ്റൽ അറസ്റ്റ് തട്ടിപ്പുകൾ വർധിക്കുന്നതിൽ കോടതി ശക്തമായ ആശങ്ക രേഖപ്പെടുത്തി.
വിദ്യാസമ്പന്നരായ ആളുകൾ പോലും ഇത്തരം തട്ടിപ്പുകൾക്ക് ഇരയാകുന്നത് എങ്ങനെയാണെന്നും കോടതി ചോദിച്ചു.
സാമ്പത്തിക സ്ഥാപനങ്ങൾ തങ്ങളുടെ ജാഗ്രതാ ഉത്തരവാദിത്വങ്ങൾ പാലിക്കുന്നതിൽ പരാജയപ്പെട്ടാൽ ഇരകൾക്ക് നഷ്ടപരിഹാരം ഉറപ്പാക്കുന്ന വ്യവസ്ഥകൾ പുതിയ നിയന്ത്രണ ചട്ടക്കൂടിൽ ഉൾപ്പെടുത്തണമെന്നും ബെഞ്ച് നിർദ്ദേശിച്ചു.
ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മാല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് പൊതുതാൽപ്പര്യ ഹർജി പരിഗണിക്കുന്നതിനിടെ ഈ നിരീക്ഷണങ്ങൾ നടത്തിയത്.
അംഗീകൃത ധനകാര്യ സ്ഥാപനങ്ങളുടെ പട്ടിക അടുത്ത വാദത്തിന് മുമ്പായി സമർപ്പിക്കാൻ റിസർവ് ബാങ്കിനോടും കോടതി ആവശ്യപ്പെട്ടു.
ഡിജിറ്റൽ അറസ്റ്റ് തട്ടിപ്പുകൾക്ക് ഇരയാകാൻ സാധ്യതയുള്ളവരുടെ അസാധാരണ സാമ്പത്തിക ഇടപാടുകൾ സംബന്ധിച്ച് സമീപത്തെ പൊലീസ് സ്റ്റേഷനുകളിൽ വിവരം അറിയിക്കുന്നതിനുള്ള സംവിധാനവും ബാങ്കുകൾ ഒരുക്കേണ്ടതുണ്ടെന്ന് കോടതി നിരീക്ഷിച്ചു.
ഓരോ ബാങ്കിനെയും പ്രത്യേകം കേസിൽ കക്ഷിയാക്കാതെ തന്നെ എല്ലാ ധനകാര്യ സ്ഥാപനങ്ങൾക്കും ബാധകമായ മാർഗനിർദ്ദേശങ്ങൾ പുറപ്പെടുവിക്കാനാണ് കോടതിയുടെ നീക്കം.
