അടൂരിൽ യുവതിയെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി. കോട്ടുമുകൾ ഷിനാസ് മൻസിലിൽ ഷെഹന (31) ആണ് മരിച്ചത്. വീടിനുള്ളിലെ ഹാളിലെ സ്റ്റെയർകേസിൽ ഷാളിൽ തൂങ്ങിയ നിലയിലാണ് കണ്ടെത്തിയത്.
തിങ്കളാഴ്ച രാത്രി ഏഴ് മണിയോടെയായിരുന്നു സംഭവം നടന്നത്. ഷെഹനയുടെ വീട്ടിൽനിന്ന് ബഹളം കേട്ടതിനെത്തുടർന്ന് അയൽവാസികൾ വിവരമറിയിച്ചു. അടൂർ നഗരസഭ കൗൺസിലർ നശ്മൽ കാവിള ഉടൻ തന്നെ സ്ഥലത്തെത്തി.
വീടിനുള്ളിലുണ്ടായിരുന്ന ഏഴംകുളം സ്വദേശിയായ ആൺസുഹൃത്തിനോട് കതക് തുറക്കാൻ നശ്മൽ ആവശ്യപ്പെട്ടു. കതക് തുറന്നപ്പോഴാണ് ഷെഹനയെ തൂങ്ങിനിൽക്കുന്ന നിലയിൽ അയൽവാസികൾ കണ്ടത്. ഷെഹനയുടെ ശരീരത്തിൽനിന്ന് രക്തം വരുന്നുണ്ടായിരുന്നു.
ഉടൻതന്നെ അടൂർ പോലീസിൽ വിവരമറിയിച്ചു. സ്ഥലത്തെത്തിയ പോലീസ് സംഘം യുവാവിനെ കസ്റ്റഡിയിലെടുത്തു. യുവാവിന്റെ ശരീരത്തിലും രക്തപ്പാടുകൾ കണ്ടെത്തിയിട്ടുണ്ട്. ഇയാൾക്ക് മുറിവേറ്റത് എങ്ങനെയാണെന്ന കാര്യം വ്യക്തമല്ല.
വിവാഹിതയും ഒരു കുട്ടിയുടെ അമ്മയുമാണ് ഷെഹന. ഭർത്താവുമായി അകന്നുകഴിയുകയായിരുന്നു ഇവർ. സംഭവത്തിൽ സമഗ്രമായ അന്വേഷണം ആവശ്യമാണെന്ന് നാട്ടുകാർ ആവശ്യപ്പെട്ടു.
മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി. ചൊവ്വാഴ്ച നടക്കുന്ന ശാസ്ത്രീയ പരിശോധനയ്ക്കും പോസ്റ്റ്മോർട്ടത്തിനും ശേഷമേ കൂടുതൽ വിവരങ്ങൾ ലഭ്യമാകൂവെന്ന് അടൂർ ഡിവൈ.എസ്.പി വി.എസ്. പ്രദീപ്കുമാർ അറിയിച്ചു. ഫോറൻസിക് സംഘം സ്ഥലത്തെത്തി തെളിവുകൾ ശേഖരിക്കും.
സംഭവം നടന്ന വീട്ടിൽ ആ സമയത്ത് മറ്റാരെങ്കിലും ഉണ്ടായിരുന്നോ എന്ന് പരിശോധിക്കുന്നുണ്ട്. യുവാവിന്റെ മൊഴി പോലീസ് വിശദമായി രേഖപ്പെടുത്തി വരികയാണ്. പ്രദേശവാസികളിൽ നിന്നും പോലീസ് വിവരങ്ങൾ ശേഖരിക്കുന്നുണ്ട്.
ശാസ്ത്രീയ പരിശോധന ഫലം ലഭിച്ച ശേഷം കൂടുതൽ പേരെ ചോദ്യം ചെയ്യുമെന്ന് പോലീസ് വ്യക്തമാക്കി. കേസിൽ ദുരൂഹത നിലനിൽക്കുന്നതിനാൽ കർശനമായ നടപടികളിലേക്ക് നീങ്ങാനാണ് പോലീസിന്റെ തീരുമാനം.
