രാജ്യത്തെ ഏറ്റവും വൃത്തിയുള്ള നഗരങ്ങളെ കണ്ടെത്തുന്ന സ്വച്ഛ് സർവേക്ഷൺ 2025-26-ൽ ‘സ്വച്ഛ് കോസ്റ്റൽ ടൗൺ’ വിഭാഗത്തിൽ ആലപ്പുഴയ്ക്ക് രണ്ടാം സ്ഥാനം. ഒഡീഷയിലെ പുരി ഒന്നാമതും മഹാരാഷ്ട്രയിലെ രത്നഗിരി മൂന്നാമതുമെത്തി. ന്യൂഡൽഹി വിജ്ഞാൻ ഭവനിൽ ബുധനാഴ്ച നടന്ന ചടങ്ങിൽ രാഷ്ട്രപതി ദ്രൗപദി മുർമു പുരസ്കാരങ്ങൾ സമ്മാനിച്ചു.
സൂപ്പർ സ്വച്ഛ് ലീഗിൽ നവി മുംബൈ, സൂറത്ത്, വിജയവാഡ എന്നിവ ആദ്യ മൂന്ന് സ്ഥാനങ്ങൾ നേടി. പത്ത് ലക്ഷത്തിലേറെ ജനസംഖ്യയുള്ള നഗരങ്ങളിൽ ഗ്രേറ്റർ വിശാഖപട്ടണം ഒന്നാമതും ജബൽപൂർ, ലഖ്നൗ എന്നിവ തുടർസ്ഥാനങ്ങളിലുമാണ്. നദീതീര നഗര വിഭാഗത്തിൽ റേവ, ബിലാസ്പൂർ, വാരാണസി എന്നിവയും ഹിമാലയൻ നഗരങ്ങളിൽ രുദ്രപൂർ, ജമ്മു, ഷോപിയാൻ എന്നിവയും പുരസ്കാരം നേടി.
ഏതെങ്കിലും ഒരു സ്ഥാപനത്തിന്റെ മാത്രം പ്രയത്നം കൊണ്ട് ശുചിത്വം സാധ്യമാകില്ലെന്ന് രാഷ്ട്രപതി പറഞ്ഞു. ജനപങ്കാളിത്തവും ഭരണപരമായ ഉത്തരവാദിത്തവും വേണം. പ്ലാസ്റ്റിക് മാലിന്യ സംസ്കരണം സ്കൂൾ പാഠ്യപദ്ധതിയിൽ ഉൾപ്പെടുത്തണമെന്നും ശുചീകരണ തൊഴിലാളികളുടെ നിർദേശങ്ങൾക്ക് പ്രാധാന്യം നൽകണമെന്നും അവർ ആവശ്യപ്പെട്ടു.
സർവേയുടെ പത്താം പതിപ്പാണിത്. 2016-ൽ 73 നഗരസഭകളുമായി തുടങ്ങിയ സർവേയിൽ ഇത്തവണ നാലായിരത്തിലേറെ നഗരങ്ങൾ പങ്കെടുത്തു. പൗരന്മാരുടെ അഭിപ്രായത്തിന് ഇത്തവണ കൂടുതൽ പ്രാധാന്യം നൽകി.
ഉറവിടം: PIB, DD News
