KERALA NEWS TODAY – തിരുവനന്തപുരം: ജീവന്‍ കൊടുത്തും കേരളത്തിന്റെ സമാധാനവും സാഹോദര്യവും നിലനിര്‍ത്തുമെന്ന്‌ മുഖ്യമന്ത്രിയുടെ അധ്യക്ഷതയിൽ ചേർന്ന സർവ്വകക്ഷിയോഗത്തില്‍ പ്രമേയം.
കളമശ്ശേരി സ്ഫോടനത്തിന്റെ പശ്ചാത്തലത്തിൽ ചേർന്ന യോഗത്തിലാണ് പ്രമേയം ഏകകണ്ഠമായി പാസ്സാക്കിയത്.
സമാധാനത്തിന്റെയും സാഹോദര്യത്തിന്റെയും സാമൂഹ്യ സാഹചര്യമാണ് കേരളത്തെ ലോകത്തിന്റെ തന്നെ ശ്രദ്ധാകേന്ദ്രമാക്കിയ പ്രധാനപ്പെട്ട ഘടകങ്ങളിലൊന്ന്.
ഈ അന്തരീക്ഷത്തെ ജീവൻ കൊടുത്തും നിലനിർത്താൻ പ്രതിബദ്ധമായ പാരമ്പര്യമാണ് കേരളീയർക്കുള്ളതെന്ന് പ്രമേയത്തിൽ പറയുന്നു.
കേരളത്തിന്റെ അഭിമാനമായ ഈ പൊതുസാമൂഹ്യ സാഹചര്യത്തിൽ അസഹിഷ്ണുതയുള്ളവരും അതിനെ ഇല്ലാതാക്കാൻ വ്യഗ്രതപ്പെടുന്നവരുമുണ്ട്. ഇവരുടെ ഒറ്റപ്പെട്ട ശ്രമങ്ങളെ അതിജീവിച്ച് ഒറ്റമനസ്സായി കേരളം മുമ്പോട്ടുപോകുന്ന അവസ്ഥ എന്തു വില കൊടുത്തും ഉറപ്പാക്കും.
പരസ്പര വിശ്വാസത്തിന്റെയും കൂട്ടായ അതിജീവനത്തിന്റെയും കാലത്ത് അവിശ്വാസത്തിന്റെയും അസഹിഷ്ണുതയുടെയും വിഷവിത്തുകൾ വിതച്ച് ഇല്ലാതാക്കാനുള്ള ശ്രമങ്ങളെ എല്ലാ ശക്തിയുമുപയോഗിച്ച് ചെറുത്തുതോൽപ്പിക്കും.
ഊഹാപോഹങ്ങളും കെട്ടുകഥകളും പടർത്തി സമൂഹത്തിൽ സ്പർദ്ധ വളർത്തി ജനസമൂഹത്തെ ചേരിതിരിച്ച് പരസ്പരം അകറ്റാനുള്ള ഏതു ശ്രമത്തെയും മുളയിലേ നുള്ളാനുള്ള തീരുമാനം ഓരോ വ്യക്തിയുടെയും ഭാഗത്ത് നിന്നുണ്ടാകണമെന്നും പ്രമേയത്തിൽ ചൂണ്ടിക്കാട്ടുന്നു.
എല്ലാ ജാതി-മത വിശ്വാസികൾക്കും അവരുടെ വിശ്വാസങ്ങളിൽ ഉറച്ചുനിൽക്കാനുള്ള സ്വാതന്ത്ര്യമുള്ള സമൂഹമാണിത്. ഭരണഘടനയുടെ അടിസ്ഥാന പ്രമാണങ്ങളിലൂന്നി നിൽക്കുന്ന അവകാശസംരക്ഷണം ഉറപ്പുനൽകും.
ഒരു വിശ്വാസപ്രമാണത്തിനെതിരെയും വിദ്വേഷം പ്രചരിപ്പിക്കുന്ന സാഹചര്യമുണ്ടാകരുത്.
ഒരു വ്യക്തിയെയും, സമുദായത്തെയും, വിശ്വാസ സമൂഹത്തെയും സംശയത്തോടെ കാണുന്ന സ്ഥിതിയും അനുവദിക്കരുത്.
അത്തരം ചിന്തകളുണർത്താൻ ശ്രമിക്കുന്ന ഛിദ്രശക്തികൾ നാടിന്റെയും ജനതയുടെയും പൊതു ശത്രുക്കളാണെന്ന് മനസ്സിലാക്കണമെന്നും യോഗം വിലയിരുത്തി.
ഒറ്റപ്പെട്ട ഏതെങ്കിലും ഒരു സംഭവത്തെ മുൻനിർത്തി കേരളത്തെയും സംസ്ഥാനത്തിന്റെ അഭിമാനകരമായ മതനിരപേക്ഷ പാരമ്പര്യത്തെയും സാംസ്കാരിക പൈതൃകത്തെയും അപകീർത്തിപ്പെടുത്താൻ നടക്കുന്ന ശ്രമങ്ങളെ ഒറ്റപ്പെടുത്താൻ ഒറ്റക്കെട്ടായി നിൽക്കണമെന്ന് ജനങ്ങളോട് അഭ്യർഥിക്കുന്നു.
സമാധാനവും സാമുദായിക സൗഹാർദവും മതനിരപേക്ഷ യോജിപ്പുമെല്ലാം ശക്തിപ്പെടുത്തി മുമ്പോട്ടു പോകുമെന്നും യോഗം വ്യക്തമാക്കി.