KERALA NEWS TODAY-കൊച്ചി : ഐഎസ്എൽ മത്സരങ്ങൾ തുടങ്ങിയതോടെ കൊച്ചി മെട്രോയിൽ ലക്ഷം കടന്ന് യാത്രക്കാർ.
കൊച്ചിയിൽ ഇന്നലെ നടന്ന കേരള ബ്ലാസ്റ്റേഴ്സ് – ബെംഗളൂരു എഫ്സി ഉദ്ഘാടന മത്സരം കാണാൻ കേരളത്തിലെ ഫുട്ബോൾ ആരാധകർ കൂടുതലും യാത്രക്കായി തിരഞ്ഞെടുത്തത് കൊച്ചി മെട്രോയാണ്.
സാധാരണ ദിവസത്തേക്കാൾ 30 ലധികം സർവീസുകളാണ് കൊച്ചി മെട്രോ ഐഎസ്എൽ ഉദ്ഘാടനമത്സര ദിനത്തിൽ നടത്തിയത്.
ഇന്നലെ മാത്രം 1,27,828 പേർ കൊച്ചി മെട്രോയിൽ യാത്ര ചെയ്തു.
ഈ വർഷം ഇത് 24-ാം തവണയാണ് യാത്രക്കാരുടെ എണ്ണം ഒരു ലക്ഷം കവിഞ്ഞത്.
ഈ മാസം ഇതുവരെ ശരാശരി ദൈനംദിന യാത്രക്കാരുടെ എണ്ണം 91,742 ആയിരുന്നു.
മത്സരത്തിൻ്റെ പശ്ചാത്തലത്തിൽ മെട്രോ സ്റ്റേഷനുകളിലെ തിരക്ക് നിയന്ത്രിക്കുന്നതിനായി പ്രത്യേക സംവിധാനങ്ങൾ ഏർപ്പെടുത്തിയിരുന്നു.
രാത്രി 10 മണിമുതൽ ടിക്കറ്റ് നിരക്കിൽ ഏർപ്പെടുത്തിയ 50 ശതമാനം ഇളവും യാത്രക്കാരെ ആകർഷിക്കാൻ ഇടയാക്കി.
കൊച്ചിയിൽ മത്സരം നടക്കുന്ന ദിവസങ്ങളിലെല്ലാം രാത്രി 11:30 വരെ മെട്രോ അധിക സർവീസ് ഏർപ്പെടുത്തിയിട്ടുണ്ട്.
കൊച്ചി മെട്രോയുടെ പേ ആൻഡ് പാർക്ക് സൗകര്യവും ഇന്നലെ മികച്ച രീതിയിൽ ഉപയോഗിക്കപ്പെട്ടതായി കെഎംആർഎൽ അറിയിച്ചു.
വരും ദിവസങ്ങളിലും നഗരത്തിലെ ഗതാഗതക്കുരുക്ക് ഒഴിവാക്കാൻ കൊച്ചി മെട്രോ സ്റ്റേഷനുകളിലെ പേ ആൻഡ് പാർക്ക് സൗകര്യം ഉപയോഗിക്കാം.
തൃശൂർ, മലപ്പുറം ഭാഗത്തുനിന്ന് വരുന്നവർക്ക് ആലുവ മെട്രോ സ്റ്റേഷനിലെ പാർക്കിങ് സ്ഥലത്ത് ബസുകളും കാറുകളും പാർക്ക് ചെയ്ത ശേഷം മെട്രോയിൽ സ്റ്റേഡിയം ഭാഗത്തേക്ക് യാത്ര ചെയ്യാൻ സൗകര്യമുണ്ട്.
50 കാറുകളും 10 ബസുകളും ഒരേസമയം പാർക്ക് ചെയ്യാനുള്ള സൗകര്യമാണ് ആലുവ സ്റ്റേഷനിലുള്ളത്.
പറവൂർ, കൊടുങ്ങല്ലൂർ വഴി ദേശീയപാത 66ൽ എത്തുന്നവർക്ക് ഇടപ്പള്ളി മെട്രോ സ്റ്റേഷന് സമീപത്തെ പാർക്കിങ്ങിൽ വാഹനം പാർക്ക് ചെയ്ത് ജെഎൽഎൻ സ്റ്റേഡിയം സ്റ്റേഷനിലേക്ക് യാത്ര ചെയ്യാനാകും.
15 ബസുകളും 30 കാറുകളും ഇടപ്പള്ളിയിൽ പാർക്ക് ചെയ്യാനുള്ള സൗകര്യമുണ്ട്.
ആലപ്പുഴ, തിരുവനന്തപുരം ഭാഗത്തുനിന്ന് റോഡ് മാർഗം വരുന്നവർക്ക് വൈറ്റിലയിൽനിന്ന് കൊച്ചി മെട്രോയിൽ യാത്ര ചെയ്ത് സ്റ്റേഡിയത്തിലേക്കെത്താം.
കോട്ടയം, ഇടുക്കി മേഖലയിൽനിന്ന് വരുന്നവർക്ക് എസ്എൻ ജങ്ഷൻ, വടക്കേക്കോട്ട സ്റ്റേഷനുകളിൽനിന്ന് മെട്രോ സേവനം ഉപയോഗിക്കാൻ കഴിയും.