റോഡ് മുറിച്ച് കടക്കുന്നതിനിടെ ഉണ്ടായ അപകടത്തെ തുടർന്ന് അബോധാവസ്ഥയിലായിരുന്ന യുവതി മരിച്ചു

റോഡ് മുറിച്ചു കടക്കുന്നതിനിടെയുണ്ടായ അപകടത്തിൽ ​ഗുരുതരമായി പരിക്കേറ്റ നിയമ വിദ്യാർത്ഥിനി മരിച്ചു. 15 മാസമായി അബോധാവസ്ഥയിൽ കഴിയുകയായിരുന്ന തോണ്ടൻകുളങ്ങര കൃഷ്ണകൃപയിൽ വാണി സോമശേഖരൻ (24) ആണ് മരിച്ചത്. 2023 സെപ്റ്റംബർ 21ന് ഏറ്റുമാനൂർ സിഎസ്ഐ ലോ കോളജിന് മുന്നിലായിരുന്നു അപകടം. അപകടത്തിൽ വാണിയുടെ തലച്ചോറിന് ​ഗുരുതരമായി പരിക്കേറ്റിരുന്നു. ഇതിന് പിന്നാലെ വാണി അബോധാവസ്ഥയിലാകുകയായിരുന്നു. മൂന്ന് മാസത്തോളമായി വീട്ടിൽ തന്നെ ഒരുക്കിയ വെന്റിലേറ്റർ സൗകര്യത്തിൽ വാണിയെ പരിചരിച്ചുവരികയായിരുന്നു. അമ്പലപ്പുഴ മണി ജ്വല്ലറി ഉടമ സോമശേഖരന്റെയും മായയുടെയും മകളാണ്.