KERALA NEWS TODAY-കൊച്ചി: ഇന്ത്യയിലെ ഏറ്റവും വലിയ ടെലികോം ശൃംഖലയായ
റിലയന്‍സ് ജിയോ ഇന്‍ഫോകോം ലിമിറ്റഡ്, ഇന്ത്യയിലുട നീളമുള്ള വരിക്കാര്‍ക്ക് മുന്‍നിര
സ്മാര്‍ട്ട് ഹോം, ചെറുകിട ബിസിനസ്സ് സേവനങ്ങള്‍ നല്‍കുന്നതിനായി സ്മാര്‍ട് ഹോം സാങ്കേതിക വിദ്യ സ്ഥാപനമായ പ്ലൂമുമായി പങ്കാളിത്തം പ്രഖ്യാപിച്ചു.
ഈ പങ്കാളിത്തത്തിലൂടെ പ്ലൂമിന്റെ ഏറ്റവും മികച്ച ക്ലൗഡ് പ്ലാറ്റ്ഫോം ഉപയോഗിച്ച്
ഇന്ത്യയിലെ ഏകദേശം 200 ദശലക്ഷം സ്ഥലങ്ങളില്‍ ജിയോ അത്യാധുനിക സേവനങ്ങള്‍ എത്തിക്കും.
ക്ലൗഡ് ടെക്‌നോളജി വഴി ഫിക്‌സഡ്-ലൈന്‍, വയര്‍ലെസ് സേവനങ്ങള്‍ വാഗ്ദാനം ചെയ്യുന്നതിലൂടെ,
രാജ്യത്തിനുള്ളില്‍ ആവശ്യമായ എല്ലാ അടിസ്ഥാന സൗകര്യങ്ങളും നല്‍കിക്കൊണ്ട്
ഇന്ത്യയിലെ ഉപഭോക്താക്കളുടെ ഡിജിറ്റല്‍ ആവശ്യങ്ങള്‍ പരിഹരിക്കുന്നതില്‍ ശ്രദ്ധ കേന്ദ്രീകരിക്കുമെന്ന് ജിയോ പറഞ്ഞു.
ഇത് നിറവേറ്റുന്നതിനായി, അതിവേഗ ഇന്റര്‍നെറ്റും വിനോദ സേവനങ്ങളും
നല്‍കുകയെന്ന ലക്ഷ്യത്തോടെ ജിയോ ഫൈബര്‍, ജിയോ എയര്‍ഫൈബര്‍ നെറ്റ്വര്‍ക്കുകള്‍ സ്ഥാപിച്ചിട്ടുണ്ട്.
ഈ പുതിയ പങ്കാളിത്തിലൂടെ പ്ലൂമിന്റെ എഐ ക്ലൗഡ് അധിഷ്ഠിത പ്ലാറ്റ്ഫോമിലൂടെ
ഹോംപാസ്, വര്‍ക്ക്പാസ് ഉപഭോക്തൃ സേവനങ്ങള്‍ ജിയോ വിന്യസിക്കും.
ഈ സേവനങ്ങളില്‍ ഹോള്‍-ഹോം അഡാപ്റ്റീവ് വൈഫൈ, കണക്റ്റഡ് ഉപകരണങ്ങളുടേയും
ആപ്ലിക്കേഷനുകളുടേയും പ്രകടനം മെച്ചപ്പെടുത്തല്‍, കണക്റ്റുചെയ്ത ഉപകരണങ്ങള്‍ക്കുള്ള
സൈബര്‍ ഭീഷണികളില്‍ നിന്ന് സംരക്ഷണം, വിപുലമായ രക്ഷാകര്‍തൃ നിയന്ത്രണങ്ങള്‍,
വൈഫൈ മോഷന്‍ സെന്‍സിംഗ്, അധിക ഫീച്ചറുകള്‍ എന്നിവ ഉള്‍പ്പെടുന്നു.
പ്ലൂമിന്റെ ഹേസ്റ്റാക്ക് സപ്പോര്‍ട്ട്, ഓപ്പറേഷന്‍സ് സ്യൂട്ട് എന്നിവയിലേക്കുള്ള ആക്സസ്,
പ്രകടനവുമായി ബന്ധപ്പെട്ട പ്രശ്നങ്ങള്‍ തിരിച്ചറിയാനും വിശകലനം ചെയ്യാനും വേഗത്തില്‍
പ്രവര്‍ത്തിക്കാനും നെറ്റ്വര്‍ക്ക് തകരാറുകളുടെ സ്ഥാനം കണ്ടെത്താനും മൊത്തത്തിലുള്ള
ഉപഭോക്തൃ അനുഭവം നിരീക്ഷിക്കാനും ജിയോയുടെ ഉപഭോക്തൃ പിന്തുണയെയും ഓപ്പറേഷന്‍സ് ടീമിനെയും പ്രാപ്തമാക്കും.
‘കണക്റ്റഡ് ഹോം സേവനങ്ങളുടെ പോര്‍ട്ട്ഫോളിയോ വിപുലീകരിക്കുന്നതിനൊപ്പം ഞങ്ങളുടെ
ഉപഭോക്താക്കള്‍ക്ക് ഏറ്റവും നൂതനവും സുരക്ഷിതവുമായ ഇന്‍-ഹോം ഡിജിറ്റല്‍ സേവനങ്ങള്‍
നല്‍കേണ്ടത് ജിയോയെ സംബന്ധിച്ച് നിര്‍ണായകമാണ്”, റിലയന്‍സ് ജിയോ പ്രസിഡന്റ് മാത്യു ഉമ്മന്‍ പറഞ്ഞു.
‘പ്ലൂം പോലുള്ള പങ്കാളികളില്‍ നിന്നുള്ള മുന്‍നിര പ്ലാറ്റ്ഫോമുകള്‍ ഉപയോഗിച്ച്, ഞങ്ങളുടെ സേവനങ്ങള്‍ ശക്തിപ്പെടുത്തുന്നതും മെച്ചപ്പെടുത്തുന്നതും ജിയോ തുടരുമെന്നും അദ്ദേഹം കൂട്ടിച്ചേര്‍ത്തു.
പ്ലൂമിന്റെ സേവനങ്ങളുടെ ആഗോളതലത്തിലുള്ള വിപുലീകരണത്തിന്റെ ഭാഗമാണ് ജിയോയുമായുള്ള പങ്കാളിത്തമെന്ന് പ്ലൂം ചീഫ് റവന്യൂ ഓഫീസര്‍ അഡ്രിയാന്‍ ഫിറ്റ്സ് ജെറാള്‍ഡ് പറഞ്ഞു.