പനങ്ങാട് : പനങ്ങാട് പാലത്തിന് നടുവില്‍ ബെന്‍സ് കാര്‍ നിര്‍ത്തിയിട്ട് മദ്യപിച്ച സംഘത്തിനെ ചോദ്യം ചെയ്ത പെട്രോളിങ്ങിനെത്തിയ പോലീസിനെ ആക്രമിച്ചു ഏഴ് അംഗ കൂട്ടം. സംഘത്തിലെ ഏഴ് പേരെയും പോലീസ് അറസ്റ്റ് ചെയ്തു. ആലപ്പുഴ തൈക്കാട്ടുശ്ശേരി സ്വദേശികളായ വേലംവെളി വീട്ടില്‍ ഷമീര്‍, വാത്തിവീട്ടില്‍ അനൂപ്, കുമ്പളശ്ശേരി മനു, പള്ളത്തിപ്പറമ്പില്‍ വീട്ടില്‍ വര്‍ഗീസ്, അമ്പാടി കൃഷ്ണ നിവാസില്‍ ജയകൃഷ്ണന്‍, പുന്നംപൊഴി വീട്ടില്‍ കിരണ്‍ബാബു, വേലിയില്‍ വീട്ടില്‍ അജയ കൃഷ്ണന്‍ എന്നിവരാണ് അറസ്റ്റിലായത്. ബെന്‍സ് കാര്‍ പാലത്തിന് നടുവില്‍ നിര്‍ത്തി റോഡിലും ഫുട്പാത്തിലുമായി നിന്ന് മദ്യപിക്കുന്ന സംഘത്തോട് പട്രോളിങ്ങിന് എത്തിയ പോലീസ് ഉദ്യോഗസ്ഥര്‍ കാര്‍ മാറ്റിയിടാന്‍ പറഞ്ഞു. എന്നാല്‍ കാര്‍ മാറ്റില്ലെന്ന് പറഞ്ഞ് സംഘം പോലീസിനെ അസഭ്യം പറഞ്ഞു. വെല്ലുവിളി തുടര്‍ന്നപ്പോള്‍ കൂടുതല്‍ പോലീസുകാര്‍ എത്തി പ്രതികളെ കസ്റ്റഡിയില്‍ എടുക്കാന്‍ ശ്രമിക്കുന്നതിനിടയില്‍ പ്രതികള്‍ പോലീസുകാരെ ആക്രമിക്കുകയായിരുന്നു. പരിക്കേറ്റ പോലീസ് ഉദ്യോഗസ്ഥര്‍ തൃപ്പൂണിത്തുറ താലൂക്ക് ആശുപത്രിയില്‍ ചികിത്സ നേടി. അറസ്റ്റിലായ ഏഴ് പേരെയും കോടതി റിമാന്‍ഡ് ചെയ്തു.